ملاح الويكاب


ملاح الويكاب

هذه الوصفة كنت اسمع عنها فقط وقد تعرفت عليها من الغالية هنوها 

اول مرة اعملها و اتذوقها ………..مممم مميزة

المكونات:

½1 كوب لوبيا بيضاء مجروشة، 2 بصلة كبيرة، ¼ كوب زيت

2 كوب حليب،3 م ك فول سوداني مطحون، 1 م ص ويكة (بامية جافة مطحونة)

حجر صغير ويكاب، ملح ، فلفل اسود، مكعب ماجي (اختياري)

الخطوات:

تغسل اللوبيا جيد وتترك حتي يتصفي الماء

يقطع البصل شرائح رفيعة ويقلب في الزيت حتي يدبل

تضاف الوبيا المجروشة وتقلب مع البصل

ينقع حجر الويكاب في ½ كوب ماء

يضاف مقدار من الماء يكفي غمر الوبيا تم يضاف منقول الويكاب ومكعب ماجي

وتترك حتي تغلي، تخفض النار حتي تستوي اللوبيا مع التحريك من

وقت لآخر واضافة الماء ان احتاج (يمكن استخدام حلة الضغط)

تفرك المكونات حتي تدوب ثم يضاف الملح والفلفل و الحليب

والفول المطحون بعد اذابته في قليل من الماء


وتترك علي النارحتي تبدأ في الغليان مع الاستمرار في استخدام المفراكة

(يمكن استخدام الهراسة الكهربائية أو مصفي الخضار ليكون ناعم)

ثم تضاف الويكة مع التحريك حتي يختلط الجميع وتترك لمدة 3 دقايق اخري علي النار

يمكن اضافة السمن البلدي علي الوجه لاضافة نكهة مميزة

ويقدم مع العصيدة


او مع الكسرة

39 تعليقات على “ملاح الويكاب

  1. جزاك الله خير مجهود مقدر منك ربنا يجعله في ميزان حسناتك لما ارجع السودان انشالله اكيد حاجربه لانو حجر الويكاب امكن صعب القاه في الرياض

  2. الله عليك يا سمسماية….طريقة جديدة بالنسبة لي وتبدو شهية …ح اجربها باذن الله….شكرا للابداع

  3. سمسمايه نكتي الملاح ده من وين
    غايتو ما اظنو تبع الشوايقه
    اول مره اعرفو لكن بجربو شكلو لذيذ
    بس اجيب حجر الويكاب زاتو من وين ؟؟؟؟؟

  4. السلاااام عليكم
    مشتاقين والله تصدقي أول مرة أعرف إنو الويكاب دا حجر ياربي عندو إسم تاني؟

    • الويكاب ما حجر يا هندود هو عبارة عن سيقان الدخن بتحرق وبعدين بتتحجر وشكلها بيكون كدا
      ممكن تفركي بيه الملاح زب العطرون بس هو طعمةمميز

  5. تسلمي سمسماية اي حاجة من يدك روووووووووووووووووعة و رغم اني ما بعرفه لكن باين عليهو لذيذ

  6. الويكاب تبع ناس الجزيره اظن
    ويا ريت لو صورتي لينا الحجر عشان نتعرف
    عارفه جيرانا في السودان من الجزيره لمن خلصت اجازتي اتشهى ليهم فيهو وما عملو عاد تاني براي بسوي بس الحجر ده يلقو وين والفاصوليا مبلوله ولا ناشفه كده
    وتسلم ايدك وايد هنوها

    • ههههه
      تاني سويه براك ساهل
      هي لوبيا بيضاء ما فاصوليا🙂 بتكزن مدروشه بتغسليها وبتصفي منها الموية الويكاب دا نسأل هنوها بتلقي في السعودية ولا لا

  7. أزيك يا سماسم:مشتاقين .أول مره أسمع بالويكاب لكن أي حاجة من طرفك تحفة يا تحفة..
    (ماتطولي مننا يامبدعة لو ما شفناكي يومي بنصدع)

    • مرحب ام مآب
      اول مرة آكله انا بس كنت بسمع بيه لكن هنوها حببتني فيهلها التحية🙂
      ياريت كل الناس تجربه

  8. غايتو انا ما مع الحناكيش ديل لأني أكلتو قبلك ياسماسم _أمي عندها صديقتها من مدني كل ما تعمل بترسل ليها
    يبقي إنت الحنكوشة ههها…
    بس من طبعي مابحب أسأل أي زول عشان كدة ما صدقت لم لقيت مدونتك_ وأي شيئ عايزاهو لقيتو و..بأحلي طعم _هسسسة ماشة أعمل دونات والله دائما بدعو ليك ولي والدتك في الحرم
    لأني تعلمت منك كتييير أتمنى إنك تطبعي لينا كتاب لأنو التصفح صعب شوية خاصة إني بي جوال

  9. الويكاب جميل والمضمون اجمل وانا بعد اجي بجيب معاي شوال ويكاب للراغبين

  10. ياسمسماية الحناكيش ديل لو سمعوا بملاح اللبن حقي انا وثويبة بت كنيش يقولو شنو هههههههه

    • لا ما الكرارة الكرارة دي ملاح الروب الذي النعيمية بس نا فيه صلصة ولا طماطم
      ملا البن بتاع سارة بيتلايق بالويكة بيكون لايوق زي ام رقيقة بس ابيض🙂

  11. ههههه والله أنا خايفة سمسمة زاتا ماتكون عارفاهو..
    غايتو حق الشوايقة
    (طبعا انا عارفة اسمو وانو بتعمل فيهو سكر وبتأكل بالكسرة …وبسس)
    يعني أنا حن(ما )كوشة_هههه

  12. كان نفسي اعرف طريقة عمل الويكاب ريحتنا كثير بجد جهد مقدر مشكورة تسلم الايادي وتسلمي ياسمسماية

  13. انحنا حقنا حليب وبصلة وثوم وشطة خضراء وملح وفلفل وويكاب وويكة وفي ناس بتعمل شوية سكر

  14. قمه فى الابداعات اخت سمسماية و الويكاب شوفتو قبل سنين عند حبوبتى فى الدندر دائما افكارك رائعة تسلم الايادى ومزيد من الابداع

  15. ازيكم. اول يوم اشارك
    الويكاب جميل . انا كمان اتعلمتو قريب
    ممكن كمان تستعملي العدس بدل اللوبا ويطلع جميل جدا ولو اضفتي مع البهار شوية جنزبيل يكون جميل

  16. سلام سمسماية….. سؤال (غبي) … في حاجة كده معلبة ومكتوب عليها اللوبيا ….مرة عملتها بدل الفاصوليا لكنها مختلفة شوية…تفتكري لو عاوزة اجربها في الوصفة دي بس اخلطها ولا رايك شنو؟؟

  17. السلام عليكم عليكم اخت سمسامية بعرف الويكاب بنعملوا باللبن والعطرون وشوية بهارات ووسمعت عن الويكاب باللوبيا وبس مع الفول شكله رهيييييييييييييييييييب انشاء الله حجربه وشكرا ليك

  18. أخيراً وجدت وصفة الويكاب بارك الله فيك سمسماية دايماً مبدعة وربنا يجعل مدونتك فى ميزان حسناتك أنا بحب الويكاب عرفته من جيرانا وكل ما أمشي ناس أمي فى رمضان أتعشم جيرانا يدونا من ملاح الويكاب وقبل إسبوع ذهبت فطرت عند ناس أمي ولم يرفعوا لنا فطلبت منهم بدون خجل نحن ناس الجزيرة ومدني والسودان كله كلنا أهل وأسرة واحدة فعملوا خصيص لي بعد شراب الموية ورجعت به الي منزلي والعايش في السودان محظوظ الحمد لله الكرم والعيش بين الاهل نعمة من الله دعواتي للجميع بكل خير وأكيد ستقبلوني أخت وصديقة جديدة فى عالم سمسماية هيا أخواتي نتحدي منال العالم بوجباتنا الشهية اللي ستغذوا العالم ذاته بإذن الله ودمتم – أحلام

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s