من أنا

بسم الله الرحمن الرحيم

السلام عليكم ورحمة الله

مثل كل النساء احب الطبخ واعتبره هواية قبل ان يكون شئ أخر عندما ادخل المطبخ لطبخ اي وجبة اكون بمزاج عالي لذا اجد دائما دعوات من يتذوق طعامي …. لقد وصلت لهذه المرحلة بعد تدريب وتعليم (والرغبة موجود) وتشجيع من حولي في الاول تتلمذت علي يد امي (رحمها الله) وكانت نعم المعلم علمتني كيف يحب الانسان العمل الذي يقوم به فكنت دائما بجانبها اراقب واسأل واقترح في بعض الاوقات واذكر اول مرة عملت فيها محشي كنت صغير واكانت امي مسافرة فقلت سمسماية تفنني وعملت حلة المحشي لم يكن طعمه مثل طبخ امي .. لم يكن جيدا ولكن ادي الغرض هههههه ولكن الآن اتقنه

وعندما كبرت قليلا اصبحت امي تدربني اكثر في العطلات يكون عندي حصتي في الطبخ

كانت هنالك اصناف محددة تحبني ان اصنعها تقول لي : انت تجيدينها اكثر مني

لم اكن اصدقها ولكن بمرور السنواث أكد من حولي اني اجيد الطبخ فلك الرحمة والمغفرة امي (كم افتقدها)

كانت تدون الوصفات في دفترها وكنا نساعدها في التدوين وهنالك وصفات من صفحات المجلات ووصفات مترجمة

هذه هي دفاترها لازلت احتفظ بها ….. اصبحت مهترئة ولكن بها وصفات مميزة

هنا دفتري الذي ادون فيه ملاحظاتي عن الوصفات التي اقوم بتطبيقها وكتبي التي تعلمت منها اتقان الطبخ

 

ايضا استفدت من المنتديات وخاصة منتدي لك فقد وجدت التشجيع من الاخوات في المنتدي  هنالك اشياء بسيطة ولكن تزرع الثقة في النفس لاول مرة شاركت في موضوع طبق ومكونات احببت ان اشارك وكان مطلوب صورة اخير للوصفةوارسلت مشاركني ولم اتوقع ان انال عليها احب شعار  بعد ذلك اصبحت اطبق كثير من الوصفات بالمنتدي ثم انتقلت في فضاءات الشبكة واصبحت أقرأ واتعرف علي ثقافات الغير هنالك وصفات كنا لا نعرفها ولكن اصبح العالم صغير جدا لقد طبقت الكثير من الوصفات التي قرأتها وشاهدتها عبر القنوات وأكثرها ضبط معي الا قليلوايضا تدربت مع الشيف ام ياسمينا بمنتدي عالم حواء وكنت الشيف الذهبي تعلمت من الكثير ولازلت اتعلم …. الم اقل لكم اني احب الطبخ وأهواهـهذه الوصفات تعلمتها من خلال قرائتي والمشاهدة مع اضافة لمساتي

http://youtu.be/UJ1KGcvollE

اعمل موظفة ومقيمة في سوداني الحبيب

هذه اول مدونة انشئها وسوف تكون بوابة لتعلم اصول الطبخ، سوف اقدم ان شاء الله شتى الانواع مع التركيز على الاكلات الشعبية والمعجنات القديمة حفظا للتراث

وسوف تتوالى موضوعاتى ويمكنكم مشاركتى بالراى أو الاستفسار .

قمت باضافة مجموعة علي الـ Facebook   اسميتها مطبخ سمسماية

كمساحة للتحاور والمشاركة  بالرأي علي الرابط التالي

مطبخ سمسماية

فقد قمت مؤخرا باضافة صفحة لمشاركات زواري

مشاركات زوار مطبخ سمسماية

وصفحة للشرح والتوضيح لبعض الخطوات التي تصعب عليكم

شرح وتوضيح

قام عدد من زوار المطبخ بتطبيق بعض وصفات المطبخ التي وجدت قبول ورضي تام من

زوار المطبخ فافردت لها صفحة ايضا بعنوان تطبيقات الزوار

تطبيقات الزوار

نزولا لرغبة زوار مدونتي وباقتراح من الاخت  om Lina بضرورة وجود فهرس للوصول الي الوصفات

فقد قمت بعمل صفحة مخصصة لروابط الوصفات وسوف تتم اضاف الوصفات الجديد اول بأول

ولكن فقط ارجو كتابة ملاحظاتكم وتعليقاتكم في صفحة الزوار

الصفحة علي الرابط

روابط الوصفات

ما عليك الاّ الضغط علي صورة الوصفة

301 comments on “من أنا

  1. سمسماية… انا بشكرك جدا على الموقع الرائع داوو الي بيظهر الاكل السوداني بطريقة شهية و راقية جدا جدا,و شكل الوقع بشكل عام رائع جدا.. بشكرك مرة تانية.. و اتمنالك المزيد من النجاح.. وعايزينك تكتري من الوصفات..بالتوفيق

  2. بسم الله الرحمن الرحيم
    سمسماية
    ماشاء الله تبارك الله عليكي

    ابدعتي واتجدعتي زي بيقولو :D

    الله يديكي الصحة والعافية
    بس لو سمحتي لي عايزة منك تراسليني ضروري
    مستنية ردك يا عسل
    وكل سنة وانتي طيبة

  3. اختى ام محمد
    السلام عليكم ورحمة الله
    مشكورة اختى على الاطراء
    اختى انا حاضرة ان شاء الله
    وارجو ان اوفق فى ما بدأته
    ورمضان كريم
    ولك منى التحية

  4. شكرا ليكي سمسماية
    وصلتني راسلتك وفي انتظار قبولك لي في الماسنجر
    افضل الكلام يكون مباشر بدل اسجلو ليكي
    تعيشي يا ستي كتير …

  5. الاخت سمسماية

    اشكر ك علي الموقع الرائعة وانا في قمة السعادة مع هذه الموقع بالصدفة كنت اتصفح وعلقت علي احدي فقرات في صفحات اخري من موقعك
    اتمنا لك مزيل التألق والنجاح والي الامام

  6. الاخت الفاضلة
    سلام حار من ارض الوطن عايزين كمان ملاح الخضرة بالقراصة وكل شي جميل من تراثنا
    ولكي مني كل الشكر

  7. موقع رائع ومُشرّف أخت سمسماية، فعلا يعكس تنوع ورقي المطعم السوداني والعربي.

    وجدت الموقع صدقة فيما كنت أبحث عن طريقة عمل القرقوش مع قرب حلول فصل الشتاء في إنجلترا – وهو دواء ناجع للجوع في امسيات الشتاء الطويلةّ

    محبتي وودي،

  8. مشكورة يختى سمسمية على هذة الوصفا ت الرائعة

    حبيت ان تضعين عدادمن اوصفات

  9. ما شاء اله علييييييييييييييييييكى عينى باردة……..
    لقيت الموقع بالصدفة لكن تم حفظه في الfavorits
    انا بى صراحة ما بتعلم الشئ الا يسووه قدامى……..
    شرحك دقيق…صورك واضحة…..وصفاتك منتقاة بعناية لتشمل الجديد و القديم……
    keep up the good work
    و نحنا متابعين

    ملاحظة:عاد سواية الابرى دى قلبتى فيها الهوبة…شغلك نضيف

    اها لو كمان وريتينا سواية الكمونية تكونى ما قصرتى

    راجينّك…….ما تتأخرى

  10. كل عام وإنتي بخير أختي سمسمايه

    وصفات رائعه وتعريف وافي بالأكلات والعادات السودانيه..

    فخوره بك أختي .. ولي قدام إن شاء الله..

  11. جزاك الله خيرا يا اخت سمسمايه استفدت منك الكثير خصوصا انو نحنا في الغربه – اشكرك كثيرا -وفي انتظار المزيد والي الامام وبالتوفيق-

  12. بسم الله الرحمن الرحيم
    أختي سمسماية ….
    نتشرف… بالتميز ….الإبتكار ….والإبداع …. وتستاهلي أكثر
    بالجد مش مجاملة، لأننا نفتقد نشر أكلاتنا السودانية بطريقة جذابة وما شاء الله على الصور والشرح الدقيق الذي لا يكون إلا من متخصص ….فإلى الأمام ونحن معك،،،،،،،،
    بارك الله لك في عملك ونفع به الجميع وإن شاء الله في موازين الحسنات.

  13. شكرا علي الوصفات الجديدة للعام 2009
    الاخت الغالية سمسماية عايزة اعرف مشروب الشربوت لو سمحت ظروفك
    مزيد من النجاح

  14. كل الشكر والتقدير للأخت سمسماية بت البلد الصيلة على الموقع الرائع المفيد
    واسمحي لي ان انقل رابط الموقع الى قسم (عالم حواء) في موقعي المتواضع
    لتتمكن اخواتنا هناك من زيارتك ، وايضا ادعوك للتسجيل والمساهمة معنا لنستفيد من خبراتك ..

    الموقع / http://www.wzaki.com

    اخوك عبدالعزيز الزاكي

  15. ما شاء الله وتبارك الله دي الحاجات السمحه هنا واللا بلاش
    رفعتي راسنا يابت بلدنا ياراقيه
    واصلي وعين الله ترعاكي

  16. الاخبار والاحوال سمسماية مشتاقون بشده شديدة

    ما قلت ليك اني جيت لقيت عجينة العشرة دقايق في ابوظبي زي النار في الهشيم التقول كدي بعرفوها من زمان

    الحاجات دي بعد دا اعملي عليها رسوم

  17. جميل جداً ان سودانية تقوم بهذا العمل الرائع وبالتطبيق فعلياً وجدت ان كل شئ مظبوط وبطريقتنا البسيطة
    اتمنى لك التوفيق وان نري الجديد دوما .

  18. كلك روعة .. وحاجة مشرفة جزاك الله خير وجعله في ميزان حسناتك أنا مذيعة ونفسي اعمل معاكي مقابلة شخصية في اقرب وقت لو امكن ياريت تراسليني على ايميلي واكون جدا شاكرة.

  19. سمسماية السلام عليكم وجزاك الله الف وخبر انا عروس جديدة ومابعرف المطبخ بس ربي اعاني بيك وخليتي راجلي فاكرني ديك يالمرة في المطبخ ربي يجعلو في ميزان حسناتك ودعواتي ليك بالتوفيق ولي قدام يارب

  20. شكراً ليك يااخت سمسماية ودي اول مرة اشوف فيها هذه الافكار الجميله بس ياريت مقادير العجينة عجينة ال10 دقائق وعذراً على الالحاح بس عجبتني ونفسي اتعلمها. وجزاك الله كل خير

    • اولا شكرا ليك اختي روزا
      عجينة العشر دقائق موجودة بالمدونة
      ممكن تضغطي على الرابط الموجود مع الوصفات
      او :
      عجينة العشرة دقائق
      المقادير:

      (1) فنجان قهوة سكر، 2 ملعقة اكل خميره فوريه، 2 كاس ماء دافي،

      ذرة ملح ، 2 كاس دقيق، 2 ملعقة حليب بودر

      (2) 3 كاسات دقيق /نصف كاس زيت.
      الطريقه:

      تخلط هذه المقادير (1) مع بعض وتترك لمدة 10 دقائق

      بعدالعشر دقائق يضاف لها

      المقادير (2)

      وتعجن جيدا وتستخدم على طول

  21. بسم الله الرحمن الرحيم
    السلام عليكم ورحمة الله
    lلا خت سمسماية
    ارجو منك ان تخبريني لو سمحت كم يساوي رطل السمن بالجرام؟ و كم يساوي كوب الدقيق المستخدم في عمل الكعك الناعم بالجرام . و لك كل الشكر .

  22. السلام عليكم الاخت سمسمايه انا عايشه في امريكا ونفسي في الملاح المفروك للباميه وملاح الورق فلو تكرمتي لاني جديده في خبرة المطبخ توريني طريقة عملهم ولو في اسم تاني غير اسم الورق او عندو ترجمه بالانجيزي قوليهو لي لاني دايره اشتريها وما عارفه اسمها.
    والله يديك العافيه لانك ساعدتيني كتير.

  23. مدونة مهمة جدا جدا
    بس يا ريت في اسماء في مكونات ما بنعرفاها زي الملاس والشوفان
    هل لهم اسماء اخري

  24. مدونة مهمة جدا جدا
    بس يا ريت في اسماء في مكونات ما بنعرفاها زي الملاس والشوفان
    هل لهم اسماء اخري

  25. تسلمي يدك في طريقة الكفتة
    بس ممكن بدل البقسماط اضيف دقيق سيقا

    وشكرا

  26. لك تحية و الف شكر يا سمسمابة على الموقع الاكتر من رائع وباتمنى لك مزيد من النجاحات
    عندى استفسار بالنسنة للناس الفى امرىكا زينا كدة فى حاجات و مسميات مختلفة زى مثلا كريمة دريم ويب دى اى نوع من انواع الكريمة وتشكرى كتير

  27. أخت سمسماية
    السلام عليكم ورحمة الله
    وجدت موقعك بالصدفة ….حاجة أكثر من رائعة. ماشاء الله وصفات متنوعة وشهية. الموقع منظم . الصور ممتازة.وتطبيقاتك رائعة فعلا هذا هو السهل الممتنع.
    ربنا يجزيك كل خير عن هذا المجهود.
    ياريت كمان لو اتفضلتي ونزلتي لينا طريقة عمل الأرياح السودانية والبخور.
    الى الأمام دوماً.

  28. سمسمايتي يا عسل
    والله مشتاقه ليك فوق ما تتصورى
    طبعا موقع خطير ..انا مره كنت بفتش لصور لعمل الفسيخ ولقيتا وعليها توقيعك
    قلت دى قطع شك من صنع يديك …يسلمو
    تانى ح تلقينى لابده ليك هنا طوالى
    تسلمى وفى انتظار ابداعاتك المطبخيه
    تحياتى

  29. لك شكرى الجزيل و تهاني على هذا المجهودالجبّار و بما اننى احب الادب كثيرا فقد راقنى جدا ما قرأته من مقتطفاتك..لا يسعنى الا ان اقول لك انك انسانه مبدعه ولى عظيم الشرف بالتعرف عليك.

  30. سلام سمسماية والله انتي فوق الوصف على المجهود ,الفكرة والتقديم الرائع للمطبخ السوداني الشهي
    انا فخورة جدا بك وان شاء الله ح انضم ليك على الfacebook

    • اختي مي
      تسلمي ان شاء الله من كل شر
      كلامك يفرحني وبكم استمد طاقتي علي المضي
      مرحب بيك بينا علي الفيس بوك

      مودتي

  31. السلام عليكم ورحمة الله وبركاته
    ررررررررررررائعه المدونة هذا الي يبيه طبخات معروفه عندنا………حفظتها في المفضله مباشره :) دمتي بود

  32. سلامات سمسمايه ,نشكرك علي المجهود الرائع انا كنت متابعه معاك من زمان في منتدي لك وبالصدفه وجدت موقعك دا وانا جد مبسوطه شديد اني اتعرف عليكي واماكنت عارفه انك سودانيه والي الامام

  33. تربي يسلمك فاطمة
    اشكرك اختي فعلا كنت ولازلت مع لك ومشاركاتي هناك كتنت البداية
    ويسعدني ان اتعرف عيك ايضا
    تشكري يا بت بلدي

    مودتي

  34. هلا سمسمه ممكن اتعرف عليك اكتر ونتراسل بس ما قلتى انتى مارستى الطبخ كهوايه ولا كيف وبتدرسى ولا ربه منزل ووين مقيمه فى السودان انتى ربنا جابك لينا من السماء وفى حاجات كتيره ما كنت بعرفه اتخيلى اهم حاجه شنو واصعب حاجه كانت عندى بسكويت النشااااااااااادر بس حاسويه بعد يومين لانى بصراحه الايام الجايه دى مشغوله شدييييييد بس ادعى لى

  35. بكل حب اختي ام احمد
    يا ستي هو هواااااااية فقط
    واعمل موظفة
    مقيمة في السودااااااااان – اركويت

    ربي ان شاء الله يسهل امرك اختي ويوفقك في مسعاااااااك

  36. انا ساكنه فى الخرطوم وحابه اشوفك الاقيك اتعرف عليك اكتر
    ازا ما عندك مانع طبعا

    • اهلا وسهلا ام لجين مرحبتين
      ان شاء الله نتلاقي مدام انت في الخرطوم
      وان شاء الله ما اخرب ليكم الصورة فى خيالكم
      ههههههههههههه

      مودتي

  37. سلام عليكم يا اخت سمسماية
    كيفك وكيف احوالك انا حابة اتعرف عليك لانك بالجد بتقدمي حاجات مبالغة شديد ودا فخر لينا انه يكون في مثال رائع زيك للسودان في المجال دا ونتمنا نلاقيك

    ا اختك ام تامر

    • تسلمي ام تامر من كل شر
      يا ستي انا حاضرة وبشكرك علي الاطراء
      بس تأكدي انه بكون سعيدة بيكم جدا
      ودعمكم دا براهو بالدنيا
      وان شاء نترتب للقاء وتتبعوا لقاءات كتيرة
      بس زي ما قلت لام لجين
      اوع الصورة تخرب
      هههههههههه

      مودتي

  38. انا نفسى اتعلم منك الخبايز بى انواعها اشكال وناعم واى حاجه بتعرفيها دا لو سمحتى طبعا

  39. سبحان الله ياسمسمايه الايام دي لاني علي بطبق في وصفاتك الراااائعه وبعشي بيها العيال 000 وبغديهم بيها كمان000 الاولاد جنو وبقو ال24 ساعه اسم سمسمايه علي لسانهم لدرجة اني حلمت بسمسمايه 0000 حلمت باني دخلت علي نفس الصفحه دي وسالتك من اسم الوالده ربنا يرحمها ويغفر ليها قلتي لي اسمها اقبال 000 واختي اسمها مي وعندي 3 اخوان واديتيني شبشب ابيض هديه 00 سبحان مديتيهو لي بيدك فقط 000انشاءالله خير يارب

  40. اختى العزيزه احس انك تتفوقين على كل الطبباخين الشوفناهم على الشاشت التلفزيونيه وحرام تضيعى مجهودك سدى والله كلامى حب فيك فى وصفاتك الراىعه

  41. السلام عليكم اختى سمسمايه اختى ارجوا منك عمل الحلويات لانى فاشله جدا فيها ارجوك سمسمايه اى حلويات واكون شاكره

    • ان شاء الله يا حزينه اعمل ليك انواع من الحلويات
      بس يا ريت تورين اي نوع من الحلويات انت بتفضلي

      مودتي :)

  42. ماشاءالله عليك سمسمايه

    ربنا يحفظ ويحقق أمانيك

    ويرحم الوالده

    المدونة اصبحت مرجع اساسي

  43. السلام عليكم سمسماية
    يا أختي والله مشكورة على الموقع ده ..على فكرته وتطبيقاته بالصور والخطوات التي يندر توفرها في أغلب مواقع المطبخ وخصوصا العربية ووالله ما أقدر أوصف اعتزازي بيك قدر شنو و اعجابي بي بساطة وصفاتك وتوثيقك لأكلاتنا السودانية.
    ومن كثرة اعجابي رسلت الرابط لي صديقاتي بس كانت في بعض التعليقات منهن أنا نفسي كنت أتمنى تغييرها وقلت أحسن أقترح عليك عشان نرقى بالموقع أكتر . وهي صعوبة التنقل من وصفة لأخرى. بمعنى أنه ياريت لو تضعي قائمة باسماء الاكلات كل واحدة تحت عنوان رئيسي مثلا : الحلويات: وتحتها تكون قائمة الوصفات الحلوة وهكذا … وده يكون في الصفحة الاولى ومنها الواحد ينقر على أي وصفة ثم تنقله للصفحة المطلوبة.
    ده مجرد اقتراح ما عارفة رأيك شنو !! ربما يتطلب منك جهد كبير للتغير أو ربما يكون عندك فكرة أخرى.
    تمنياتي ليك بالتوفيق دوما وربنا يجزيك كل خير على هذا الموقع الذي أحببناه كثيرا… ودمتي

  44. وعليكم السلام ورحمة الله

    كلامك صحيح ميه الميه
    بس يا ام لينه انا محكومة بقالب محدد
    ولانو القالب مجاني بتكون الخيارات محدودة .. لكن خليتي احاول
    اعمل زي ما قلتي لو في طريقة
    وان شاء الله لي قدام ح اعمل مدونة مدفوعة فبيكون سهل اعمل فيها الحاجة العايزاها
    ومشكورة علي حرصك علي واجهة مدونتكم
    فهي منكم ولكم :)

  45. هلا سمسمه والله زمان ما دخلت النت حبيت اسلم عليك ونفسى اتابع واعرف كل جديد بس مالاقيه فرصه وبمناسبه السودان واركويت زكرتينى صديقتى ساكنه هناك وزمن من اخباره وانا احب اكون صديقه للمدونه وانا مقيمه فى ابوظبى

    • الف مرحب يا ام احمد
      جدا يسعدني ان انضممتي الينا وان شاء الله تجدينا اخوات عزيزات
      ان اردتي اشتركي في بريد المدونة يصلك الجديد عبر الميل
      او كوني معنا في قروب مطبخ سمسماية علي الفيس بوك
      ايضا يصلك جديد المدونة
      فاهلا بك اخت وصديقة
      اتمني ان تكون صديقتك بخير
      وربنا يرد غربتكم
      مودتي

  46. هلا سمسمة بشكرك للرد وتفاعلك معانا وفعلا وصلنى الجديد فى الايميل دمتى لنا والله لايحرمنا من طلتك وتواصلك تحيااااتى

  47. انا سودانية مقيمة خارج السودان وبحب الطبيخ والمطبخ عمل الحلويات وعجبتني فكرتك والي الامام انشاء الله وربنا يوفقك وممكن اشارك ببعض الوصفات

    • ام وئام اتفضلي مطبخنا و مطبخ سمسماية للجميع و ممكن تدخلي زوار مطبخ سمسماية و تتواصل مع المجموعات المشاركة و تنزيل اكلات و يا حبذا لو في صور

    • مرحب بيك يا ام وئام في مطبخك
      من الليلة الدار دارك وبنرحب بمشاركاتك
      وربنا يديك العافية زي ما قالت زينة ممكن تتواصلي مع ستات البيوت وامهات العيال في صفحة الزوار

    • شكرا ليكم كتير ودا طبعنا احنا السودانيين وانا عايزة اتواصل معاكم وخصوصا انو ماعندي صديقات لو سمحتو تكونو صديقاتي ونتواصل علي الفيس بوك

  48. سمسمايه جهد مقدر وجميل ويدل علي اننا لا نقل عن اخواتنا المصريات او الشاميات لكي مزيد من التقدم ومزيد من الاعجاب ومزيد من العمل الراقي كما لكي كل التحيه والاحترام وانا تحت الخدمه بالقليل مما لدي من الخبره

  49. تسلمي اختيى عفاف وربنا يديك العافية
    وان شاء الله نقدر نظهر المطبخ السوداني كما هو باكلاته اللذيذة
    ونعرف العالم العربي علي اكلاتنا الاصيلة
    وما بتقصري
    وشكرا

  50. أخت سمسماية.السلام عليكم ورحمة الله تعالي وبركاتة
    انا من زوار مدونتك الدائمين والمستغلين لها الي ابعد الحدود..بس اول مره اتواصل معاك ..ابداعك no comment وفنك لا تخطأه عين ..اناطالبه مساعده من نوع اخر من السيرة الذاتية عرفت انك موظفة ومقيمة في السودان وطبعا مبدعة في مجال المطبخ بعني بالعربي الفصيح حليتي المعادلة الصعبة_مشالله تبارك الله وربنا يزيدك ويعلي مراتبك بأذن الله-انا موظفة مقيمة في السودان اقدر اقول ادارية يعني مهام اكتر شوية من موظفة وربنا اداني راجل ذويق مابرضي بي كده وكده اها انا عاوزه خبرتك وافكارك في التجهيز المسبق شنو ممكن ينفع يتجهز قبل يو م قبل اسبوع من اللاشياء الاساسية في المطبخ وطبعا انتي كلك فهم وادري بالامور دة اضف لذلك عند تؤام اولاد 3 سنوات ..صعبتها صح.ولا عدمناك

  51. عزيزتى سمسماية طولت منك ياغالية وجيت لقيت ماشاء الله الجديد والمفيد تسلمى من كل شر يارب
    حبيت انزل كيكة الشوكولاتة بالصور كتطبيق لوصفتك لكن عذرا ما عرفت كيف ياريت لو امكن تدينى فكرة
    نحن اتكلمنا مع بعض على الخاص فى الفيس بوك لما ساعدتينى على كتابة اسمى فى الصور لو تذكرى
    انا فى انتظارك
    وتشكرى

  52. اهلا ام لينة تذكرتك يا غالية
    صور تطبيق الوصفات البنات برسلوها لي في البريد الالكتروني او بشيلها من بروفايل بريدهم او ممكن تنزليها في مطبخ سمسماية في الفيس بك وانا بحولها هنا لو اسمك ما مكتوب بكنبه ليك :)
    يعني اي واحد من الخيارات دي وانا حاضرة لاي استفسار
    مودتي

  53. سمسماية والله موقعك جميل وصراحة انا استفدتة منو كتير وصفاتك سهلة وبتتفهم بسرعة وبسيطة تفي بالطلب السوداني الاصيل اتمني ليك كل خير ونسمع عنك كل جديد .

  54. سمسمايه والله مبدعه كل الاكلات الحلوه بمقادير مناسبه وصور جميله بنشكرك شديد و انا ح اطبق كتير من الاكلات بطريقتك ان شاء الله وعجبتني شديد عجينة ال10 دقايق ريحتني شديد الليله اول مره ادخل لكن اوعدك دايما ح اكون من زوارك والعجب في رمضان ان شاء الله ليك الاجر من الله

    • تسلمي يا هند
      بالنسبة للعجينة هي عجينة ام عزيران ومنتشرة وهي عجينة راااائع
      ويسعدنا انك تكومي من ضمن زوار المدون وتتواصلي مع الجميع :)

  55. الله يوفقك ويخليك ويرزقك الصحة والعافية والجمال والسعادة وراحة البال والخير عموما ويحفظك لاحبابك ويحفظ ليك احبابك ..
    جد انا معجبة بيك خالص واتخذتك قدوتي في الطبخ ..
    نفسي من زمان والله اتعلم وماشاء الله وصفاتك لذيذة وسهلة ..
    طبعا انا عمري 17 سنة واكيد حتقولي لي بدايتك متاخرة لكن جد انا عايزة اتقن فن الطبخ .. بس ممكن تقولي لي من وين ابدا انا عايزة ابدا بحاجات سهلة كدا فياريت تديني عناوين طبخات ابتدأ بيها ..
    ومشكوووووووووووورة

    • مرحب بيك يا موني
      كل العمر ان شاء الله (دا اسمعه عمر الزهور)
      ياستي اعتبريني خالتك وخطوة خطوة تتعلمي
      ياستي ممكن في الاول تبدي بالسلطات والمقبلات النها سهلة
      وفي نفس الوقت تجويدها بيعتبر انجاز لانها مهمة جدا علي الموائد وبعده علي الاطباق المساعدة ثم الرئيسية
      بس شوية شوية وخطوة خطوة (ماتستعجلي)
      وانا حاضرة

  56. تسلمى والله
    والله يديك العافية وتجربة مميزة تستحق الاشادة والتقدير

    ودمتى ودامت حواء بلادى فخر لنا

    ولقدام ونحنا معاك بالسئلة والتعليقات عشان نستفز مهاراتك وتعلمينا ويتعلم الجيل الجديد بتاع التيك اوى دا
    جمال وطعامة اكلنا

    مودتى واحترامى
    اخوك طارق

    • ربي يسلمك اخي
      ومشكور علي الاشادة
      وانا حاضرة للاسئلة ان شاء الله معاكم خطوة خطوة

      ودامت حواء بلادي
      ودمتم انتم سندا لها

  57. احب اقوليكي ياعسل الناس بتشكر اكلاتي … لكن الماعارفينو انو البتطبخ سمسماية والله يخليها لينا

  58. السلام عليكم ورمضان كريم انا عندى طلب للاخت سمسمايه ولا لاى وحده تحب يعنى اختكم فالله انا والله راسى ضارب ومابفهم كتير فالاكل والمزهجنى اكتر انو مابعرف اختار انواع الاكل وشنو البجى مع بعض . والله بدون مبالغه بفتح التلاجه 100 مره فى اليوم عشان بس اختار اعمل شنو وفى النهايه بكون اليوم انتهى وانا ماعملتا حاجه ومااكلنا اى حاجه اليوم داك :( المهم نرجع للموضوع انا عايزه اعرف لو ممكن يعنى يكون فى اطباق تمشى مع بعض انا اختاره مثلا اليوم الاول اعمل كبسه وسلطه وفطاير وتحليه اى نوع .. اسى دا بفكر يكون حق بكره جد جد يعنى ههه لاكن صراحه محتاره اليوم التانى حيكون شنو فياريت وحده من الاخوات ترد على والله حتكونو ماقصرتو معاى كلو كلو . وياريت التعبير مايكون خانى يعنى وفهمتو انا قاصده شنو شكرا وكل سنه وانتو طيبين ..

  59. فطوم سلامات طبعا كنا زيك لكن الامور بتمشي المهم في اكلات رئيسية زي الكبسة و البخاريو ما عارفة علاقتك بالتقلية و ملاح الروب و النعيمية شنو دى طبعا بالنسبة لرمضان بعد كدة في اطباق ممكن تتعمل زي المقبلات يعني مثلا السلطات بانواعها باذنجان طحينة حمص او اي سلطات من مطبخ سمسماية و بعدين ممكن تعملي مكرونة باي وصفة لحوم زي الكفتة بانواعها او مسبكة لوحدها البيض ممكن تعمليهو باشكال كثيرة و تضيفيهو لبعض الاكلاتالبطاطس برضو الخضار زي الجزر البسلة هذا بجانب الشوربات نوعيها كل يوم و البلبلة و الفطاير و البيتزا و الطعمية و الفول مالو ما حبيب الكل مظبط مع الطعمية و الجبنة حاجة روعةههههههههههههه لكن فطوم ممكن تتابعي في مشاركات الزوار ح تلقي ناس عسل يساعدوك و دمتي حبيبتي

  60. أختي العزيزة سمسماية / تحية لك وحقيقة قرأت كثير من مشاركاتك جد رائعة وانت جد بنت حبوبتك واتمنى القدوم في هذا المشروع والتسويع على نطاق كبير وانا في الغربة بلاقي كثير من المجتمعات العربية والعندهم فكرة جد غير صحيحة عن السودان والناس المثلك يضعون كل عالي في شجرته

    في الختام اشكرك واريد منك التواصل وعندي طلبات بخصوص الخبيز السوداني جميع اشكالة ولك الشكر

    اميمة على

    • اختي اميمة
      لك كل كل التحية والاحترام
      صحيح وما تقولين عن فكرة العالم الخارجي عننا ولكن يمكننا ان نستبدل ما هو عالق باذهانهم بنشر ثفافاتنا بصورة ايجابية
      وانتم وانا هذا دورنا فالنتعاون.
      اما بخصوص طلبك فانا حاضرة لاي استفسار او اضافة او نقد
      من اجل تجويد ما لدينا
      مودتي

  61. تسلم وصفاتك ياسمسمايه, بس شدي حيلك العيد جايي علينا وعايزين وصفات خبيز .

  62. مشكورة شديد انت عارفة اول مرة في اخبز لعيد باتتباع وصفاتك وطلعت حلوة شديد لاني انا في الغربة وفي بداية حياتي مشكوررررررررررررررة

  63. والله يا سمسم ماقصرت ابدا كل وصفاتك ابداع ودااجتهاد كبير منك لك كل الشكر والتقدير لاحظت اغلب الزوار من المغتربات

  64. السلام عليكم و كل عام وانتم بخير
    انا و بناتي عرفنا الموقع دا بالصدفة وحبيناك من خلال حب الناس ليكي.وان شاء الله نكون اصدقاء الموقع المداومين

    • يسعدني جدا حبكم لى وللمدونة
      وان شاء الله نكون اصدقاء فيما بيننا ثم نكونوا اصدقاء المدونة
      ويمكنكم التواصل بصفحة الزوار
      تجدي هنالك اخوات غاليات ومنتشرات في هذا العالم الواسع
      سعدت بتعليقك

  65. السلام عليكم
    تحياتي اليك من اعاقي
    احب ان ابدي اعجابي الشديد بمدونتك وما فيها
    فقد استفدت منها جدا خاصة وانني علي زواج قريب بعد شهرين
    وعليه فقد بدا اهتمامي بالطبخ من فترة وجيزة
    وقد وجدت في مدونتك الكثير الكثير لاتعلمه
    لكي جزيل الشكر مع تمنياتي بالتوفيق

  66. السلام عليكم اختى سمسماية
    اشكرك جدا واهنيك على الجهد البذلتيه فى مدونتك وانشاء الله نستفيد منها الكثير .
    اتمنى لك التوفيق .

    • تسلمي اختي ام قصي
      وان شاء الله نستفيد من بعض كل زول يورينا خبرته في مجال المطبخ
      ونتناقش ونستفيد
      تحيتي

  67. السلام عليكم
    احب اشكرك جدا على المدونة الرائعة و على وصفاتك الواضحة السهلة التطبيق و على اسلوبك التعليمي الرائع جدا
    انا عمري 23 سنة , توفت امي من سنتين بعدما كانت مريضة لست سنوات عشان كده ما كنتا بعرف اي شي في المطبخ
    حاليا بقيت بطبخ كل حاجة و ست بيت تماااام والحمدلله . حكيت ليكي الحكاية دي لانو دا كلو حصل نتيجة لتعليمك لي و من وصفاتك الجميلة , اتعلمتا منك كل شي في المطبخ و ما عارفة اشكرك كيف ولا كيف اجازيكي ما عارفة كنتا حاعمل شنو بدونك
    الله يديكي الف عافية وصحة و يطول في عمرك و يزيد محبتك في قلوب الناس و يحقق ليكي كل امانيكي و يعلي مقامك يا رب

  68. وعليكم السلام ورحمة الله
    تسلمي يا فدوي دا بس من ذوقك وان شاء الله اقدر اوصل ليكم كا ينبغي حتي تم الفائدة
    غاليتي كل العمر لك وربنا يحفظ شبابك وربنا يرحم والدتك ووالدتي
    فظروفك تشبه ظرفي واتمني ايكون حظك اجمل واحسن من حظي يا فدوي اتمني لك ذلك والله وربنا يقدر لك الخير .
    لا اريد منكم ابدا شكرا واتمني من قلبي ان تكون المدونة دليلا يهدي كل باحثة عن وصفة فك التحية ولك الشكر غاليتي
    محبتك سمسماية :)

  69. بشكرك كتير يا سيما على ابداعاتك الحلوة انا هاجر عمري 23 سنة وام لثلاثة اطفال بصراحة تالموقع لقيتو وانا كنته بفتش لطريقة عمل بسكويت الينسون لكن ماكنته فاكره اني حالقى الابداعات دي كلها شكراليك كتتتتتتتتتتتتتتتتتتتتتتتتتتتتتتتتتير لانك مبدعه بالجدوحابه اشكرك تاني لاني استفدته من المره الاولى وانشاء الله تتحفينا باعمالك اكتر

  70. منذ عام وانا ابحث في صفحاتك …وقد اجببت انك تهتمين لما هو طبخ سوداني واللي انا اصلا ضغيفه فيهو…لذلك اشكرك جدا علي الشرح الجميل الواضح بالذات لما هم مثلي محبون للطبخ لكن مبتدئين ….

    رائيت انه ليس من العدل ان استفيد كل هذه المده ولا ااشكرك واشجعك علي الاستمرار…

    لكن لدي تعليق الرجاء اضافه جميع الوصفات فقد عانيت حتي وجدت طريقه عمل الفطير السوداني ..لانه لم يكن هناك بحث واضطريت ان اجيبه عن طريق لينك اخر

  71. الاستاذة سمسماية ارسل اليك تحياتي وكثير الشكر على وصفة الفطيرة السودانية انا بتمنى ان نتواصل فانا بشرفنى كثير بان نكون اصدقاء انا ما بشكر نفسى ولكن بشهادة الجميع نفسى حلو فى الطبخ بحب دايمن اعرف كل اكلة جديدة فاذا ارتي اي استشارة او اي مساعدة ما بتاخر عليك بتمنى انو نتعرف عن قرب فانا بتمنى انو عن طريقك اتعرف علي السودانيات الفى الدول العربية التانية لكي نرفه على بعضنا شوية فى الغربة بتمنى انو شوغلك يتطور اكثر فاكثر وشكرا

  72. سلامي للاخت سمسمه انا ام نايف من هولندا بشكرك جدا بي الوصفات الموجوده علي الموقع وطلعتني من حيره كبيره كنت بفكراعمل شنو في مناسبات في مدرسة اولادي وشاركته بي خلية النحل والاطفال في الصف عجبتم شديد خاصه طريقة الفه بتاعته كانت حلوه ومشهيه ومشكوره اختي٠

  73. تنبيه: 2010 in review « مطبخ سمسماية

  74. ربنا يحفظك رااااااااائعه كتاباتك كمان ياسلاااااااااام عليك…………………….ماشاء الله تبارك الله

  75. العزيزه سمسمه تحية اعجاب واحترام للجهد المقدر وموقعك رائع ويبعث الاعجاب بالفتاة السودانيه الاصيله اتمني ان نتواصل دائما وتكوني من الصديقات المقربات الي قلبي

  76. تسلمي اخت سمسمة وجزاك الله كل خير
    وحتكوني انتي المرجع الاول لي
    كتر الف خيرك

  77. سمسمايه الرائعة
    انا يا حبيبه، بتوحّم… ونفسي هاااااااافه على فطير بي روب (لبن)… عليك الله الحقيني بالوصفه، الله يديك العافيه على الموقع المتميّز جداً… رفعتي راسنا…

    • راسكم اصلو مرفوع يا مريم ربنا يسهل عليك
      الفطيرة عادي تعجني دقيق القمح بقليل من الملح والباكنج بودر وتخليه نص ساعة. لو بتعرفي تعوسي بي يدك خلي العجين شوية تقيل ولو بتعوسي خليه زي عجين الكسرة واذا ما بتعرفي الاتنين عملية في طوة تيفال وخلي العجين خفيف عشان لما تكبيه في الطوة وهي حارة يتوزع وناتكتري العجين عشان تكون رهيفة. أما الروب بيكون خفيف برضو لو الزبادي تقيل اضيفي ليه حليب وسكر والباقي بتكون عارفاه
      عندي طلب رسلي لي صحن بعدين، شهتيني ليه :) يديك العافية

  78. انا لقيت الموقع بالصدفه ومن ديك علاقته ما في يوم ما بشوفو مرات اكتر من مره بالجد مبالغه.وربنا يجزيك خير اختي سمسمه انتي رائعه ومبدعه اتمني ان نتواصل وربنا يوفقك

    • ربي يسلمك يا نونو يمكنك مراسلتي عبر بريد المدونة
      واكتبي بريدك الالكتروني سوف اقوم بمراسلتك من بريدي :)

  79. الفين سلام يا سمسماية

    والله بت بلد اصيلة
    وبصراحة انتى ما عارفه كيف الناس بستفيدوا من مدونتك الرائعة دى خاصة الناس خارج السودان والذين يحملهم الشوق الكبير لتناول الوجبات السودانية .. خاصة العزابة فانت بهذه المدونة الرائعة حليتى مشاكل كثيرة ..

    مدونتك جميلة وتصميمها رائع جدا وصدقينى انا عملت مدونات كثيرة لكن ما قدرت اصل للمستوى الرفيع ده..

    موفقة يا ستى دوما
    وخلينا نشوفك على الفضائيات كمان للاستفادة اكثر ..

    مع تحياتى لك

  80. مشكور اخي خالد ودي شهادة اعتز بيها وان شاء الله اكون قدر المسئولية واعكس كل ما هو جميل ومفيد :)

  81. مدونة رائعة وانتي اروع ما شاء الله عليكي

    هل انتي مشتركة في منتدي عالم حواء ؟؟؟؟؟؟

  82. انامجنونة مطبخ جدا وصراحة مدونتك قمة الابداع وانت كمان مبدعة جدا حبيت كتير اكلك وخصوصا انك سودانية ومن زمان بتابع ونفسي اشكرك لكن الظروف ماسمحت لي وبالتوفيق دائما

  83. لنا الفخر لانك سودانيه البسبوسه مابتظبط معى بحاول اقلل السعرات الحراريه عاوزه وصفه قليله السعرات

  84. اشراقة لو في طريقة ان شاء الله ما بخل ليكم
    بس بيني بينك كمية السكر الفيها براااااها موضوع
    ان شاء الله القي ليك وصفة يا حبيبة :)

  85. تسلم ايدك يا ست الكل وربنا يجزيك خير على هذا الموقع الرائعفقد كنا فى اشد الحوجة له خصوصا نحن فى بلد المهجر واتمنى استضافتى

  86. اشكرك كتيييييييييييير يا سمسمايه الرااائعه علي موقعك الجميل لقيت الموقع بي الصدفه كنت بفتش علي مقادير قراصة العجوه وبي الصدفه لقيت موقعك بي الجد اعجبت بيهو شديد لاني في بلد غربه وفاقده الام الله يرحمها ويسكنها الفردوس الاعلى مافي زول قريب مني يوريني مقادير الاكلات السودانيه واول مالقيت الموقع فتحت اغلب الوصفات وسجلتو عندي في المفضله وحااديهو لي اخواتي كمان والاهم انو الموقع من سودااااااااااااااانيه مميزه لك الشكر وموفقه وجزاك الله عنا كل خيررررررررررررر وقايمه اعمل القراصه وتسلمي يارب

  87. المدونه فيها الخير الكتير لكل السودانيات وسمسمايه قلبها كبير يتسع لكل اهلها السودانين ومن المنطلق هذا اناشد كل زائره لهذه المدونه الخيره بالدعاء في كل صلاة لاختكم السودانيه ايمان محمد حسين بالشفاء من مرض السرطان وهي مقيمه الان في بلجيكا وتصارع المرض وقال لها الاطباء لن بفبدك اي شئ ستة اشهر ماتبقي لك في الحياة
    لذا اخواتي اناشدكم اناشدكم بالدعاء لها في كل صلاه ودعوة المسلم لاخيه المسلم مستجابه الدعاء الدعاء الدعاء الدعاء يااخواتي لها بالشفاء
    وللتواصل معها تجدن صفحتها علي الفبس بوك وجزاكم الله خير الجزاء

    • ان شاء الله ربنا يشفيها ودعواتنا لها من كل القلب
      ربي خفف عنها واشفها انت الشافي … شفاء لايغادر سقما

      • اللهم اشفها انت الشافي انت الشافي شفاء لا يغادر سقما يا قادر يا كريم يارب العرش العظيم بيدك الامر كله اللهم البسها ثوب العافية يا رحمن الدنيا و رحيمها يا الله انها برحمتك نثتغيث فغثها.
        اختي لا يعلم الاقدار الا الله فباذن الله يكون امر الله

  88. السلام عليكم ورحمه الله اخت سمسمايه لم اكن اتصور وانا ابحث في النت عن اكلات السودانيه ان اجد مدونه كامله لفتاه سودانيه بهزا الروعه اولا انا اشعر بالفخر لانكي موجوده ثانيا شكر وشكر وشكر رحم الله امك واسكنها فسيح جناته يارب وغفر لها ادعوكي اختي لعمل برنامج لكي في اي قناه سودانيه اوعربيه ارجوا ان تفكري في زلك فانت تستحقين زلك فشكرا جزيل

    • وعليكم السلام هنود
      يا ستي مشكورة جدا علي الكلامات الطيبة
      وكثيرات هن السودانيات البارعات في هذا المجال وانا هاوية فقط ابحث وأقرا واتعلم واشارككم ما تعلمت
      لك التحية

  89. السلام عليكم
    عايزه اشكرك كثيييييييييير يا سمسمايه لانى بالجد استفدت منك وبقيت اليوم كله يا فى المطبخ ياعلى صفحتك
    سمسمايه العسل والله حبيتك من غير ما اشوفك

  90. السلام عليكم
    الاخت سمسمايه نشكرك علي البمجهود الجبار دا وبالجد استفدنا وبقينا خطرين كمان
    وارجو ان تقبولي ك صديقه ليكم

  91. اختى العزيزه … احييك على الموقع المميز والوصفات الجميله الواضحه … جزاك الله كل خير … وجعل الله هذا العمل فى ميزان حسناتك …

  92. منذ اول مشاركاتك في منتدى لكِ
    توقعت انك مميزة

    دام تميزك وربنا ما يضيع لك تعب

    لك مني كل الود والتقدير
    والاعجاب
    كتب الله جهدك في ميزان حسناتك

    وعود الخير

    • اسعدتني جدا اطلالتك في عالمي
      كلماتك محل تقدير وتاج علي رأسي
      لا انسي ابدا تشجيعكم لي
      دمتي بخير يا كل الخير

  93. الاخت سمسماية احييك من الاعماق ولااستطيع ان اخفي اعجابي الشديد بمدونتك بارك الله فيك رفعتي راسنا كسودانيات زادك الله رفعة

  94. اشكرك سمسماية على الموقع الجميل جدا جدا
    والذي استفدت منه كثيرا
    وتمنياتي لك بمذيد من التوفيق
    ياريت يكون هناك وصفات تخص المراه السودانيه
    ذي الريحة السودانية
    والوصفات بالخطوات المصورة المجربة

  95. Salamu Alaykum simsimaya ..
    Mashaa Allah ..This is my first time to check ur wonderful site, what you have been doing is a huge and great work .. we proud of you .. keep the good work up ,,,

    best wishes

  96. هلا خيتى تونى عضوه جديده بعد ماسويت طبخات لانى اول مره اشوف منتدى سمسماية واتمنى لو تراسلينى او ترسلين لى الوصفات بالبريد الخاص بايملى وشكرا واعذرينى على ازعاجك
    رمضان قادم واحتاج وصفات للرمضان وحتى صوانى خفيفه لانى اصلا مو طباخه كويسه

  97. اشكرك اختى سميه لما فتحته اعجبتنى طبخاتكى ولكنى ماكنت اعلم انه طبخ سودانى وانا اسمع عن الطبخ السودانى وكان نفسى اجربه بس انشاء الله اطبق وصفاتك بس البعض شوى صعب لاننى فاشله هههه تسلمى ياقمر – انا سعودية ويسرى معرفتك

  98. الغالية سمسماية فخر المطبخ السوداني ..
    ما عندي حاجة أقولها ليك غير ربنا يديك الفي مرادك ويجزيك ألف خير علي الخدمات البتقدميها لينا عبر مدونتك .
    وربنا يجعل مجهودك دا في ميزان حسناتك يوم لا ينفع مال ولا بنون .
    وأحييك علي روحك الطيبة وسماحة نفسك وتواصلك الجميل مع قراء المدونة واصدقائك في الفيسبوك .

  99. الغالية سمسماية فخر المطبخ السوداني ..
    اسأل الله العلي القدير ان يجزيك كل خير علي هذا المجهود ويجعله في ميزان حسناتك .
    ويــديـك الفي مــرادك .. حقيقة نحن بنستفيد من وصفاتك والمدونة مرجع اساسي لينا .
    فلك اجزل الشكر عزيزتي .

  100. الحقيقة يا سمسماية انك مش طباخة مبدعة وكمان فنانة وأديبة فيك جوانب راقية وبكرة الايام تأكد كلامي دا

  101. هلا وغلا انا عضو جديد واخيرا حصلت علي موقع فيه كل الاكلات السودانية مش قادرة اوصف ليك شعورى المهم انا استفتد الكثير من هذا الموقع واتني لكي المذيد من النجاح في كل حياتك الخاصة والعامه وهذا الموقع مرجع لكل السودانين في الداخل والخارج ولو سمحتي ممكن تراسليني عبر البريد طبعا علي حسب ظروفك واكون شاكرة ومقدرة وعلي رصيف الاشواق تجديني في انتظارك

  102. السلام عليكم ورحمة الله وبركاته
    أختي في الله سمسماية
    رمضان كريم وربنا يتقبل منكي هذا العمل الصالح وفي ميزان حسناتك انشاء الله وربنا يرحم والدتك وحميع موتي المسلمين

    كم كنت أتمني لو تعرفت عليكي في آخر زيارة لي للسودان قبل سنتين ولكن انشاء الله المرة القادمة — ترقبي مشاركاتي ووصفاتي ولكن بعد رمضان انشاء الله

    وكل عام وأنتي الي الله أقرب وعلي طاعته أدوم
    وجزاكي الله عنا كل خير

    أختك هاله (أم أبراهيم) من أمريكا الشمالية في مدينة
    Windsor, CA

  103. السلام عليكم
    الاخت سمسماية لكى فائق الشكر والتقدير ربنا يجزيك كل خير
    انا مبتدئة فى الطبخ وعايزة اتعلم كنت بتابع مطبخ منال العالم واسامة سيد وبطبق لكن حظى بالصدفة
    وقعنى فى موقعك دة ولقيت الفرق كبير انتى سودانية وحاجاتك هى البتناسبنى ووماقصرتى وانشاالله نصل لى مستواك .. ربنا يديك الصحة والعافية

  104. الرائعة جدا سمسماية
    رمضان كريم وكل سنة وانت بالف خير وكل السودان بخير
    بالجد ماقادرة اعبر عن هذا الابداع ربنا يوفقك ويفرج همك ويرحم والدتك
    ومتابعين لكل جديد وكمان تطبيق تمام حتى زوجى يقى يعلق على الاكل الجميل
    وفقك الله
    ام احمد – السودان

  105. الاخت سمسماية رمضان كريم وكل سنة وانت طيبة وكل الشعب السودانى بالف خير
    غايتو ابدااااااااااااع وتسلم يديك ياعسل
    ومنتظرين المزيد
    عشان نطبق
    ونستمتع بالطعم اللذيذ …. اللهم انى صايمة

  106. موقع مميز بالجد تسلمي والعين باردة عليك…..بس لو اضفت وصفات وجبات منوعة وشهية للاطفال يكون اتممت الخياطة بالحرير مرات الواحدة بتفشل في الاختيار السليم لكثرة المغريات والاكل السريع غير الصحي…

  107. سلام اخت سمسمايه لك مني كل الشكر والاحترام . صراحه انا جديده في المدونه وكل ما اقعد في الكمبيوتر بس بفتحها عجبتني حاجاتك كلها وحلاوتها في بساطتها ومقادير كلها متوفره . ما عارفه اشكرك كيف كل يوم بطبق حاجه و بتطلع مظبوطه وناويه ان شا الله اطبق كل حاجه في المدونه ربنا يديك العافيه ويجل ليك في ميزان حسناتك. لانو صراحه في ناس بيكون بيعرفو الطبخ وبيبخلو يورو الناس عشان ما يكونو احسن منهم لكن انتي ما بخلتي بحاجه وعلمتينا ربي يديك العافيه

  108. السلام عليك يا سمسا يه انا كنت ابحث عن وصفات القرقوش واليانسون فوجدت مطبخك والجميل انو هذا المطبخ لسودانية متميزة وحفظتها فى المفضله وانا ست بيت مبتدئه واتمنى لكى التوفيق

  109. ما شاء الله عليكي مبدعه ومتميزه جدا ✿عزيزتي✿ فى الطبخ وتنسيق
    اتمني لك التوفيق والتقدم وازدهر
    ويشرفني زيارتك لموقعي
    اطباقنا البيتيه الشيف ايمي
    http://www.facebook.com/atbaqna.elbytya

    لكي تحياتي وعبيرة وردي ✿

  110. حياك الرحمن حبيبتي سمسماية
    بالجد وماحتصدقي لو قلت ليك انو انا حبيتك من زمممممممممان لانك بالجد نموزج مشرفة لسودانيات وكان نفسي اتعرف عليك من زمان بس الله ماسهل
    عموما اطلب صداقتك ومعرفتك اكتر وانا من اشد المعجبين بيك وبي كل البتقدمية ومن عرفتا مدونتك دي كل يوم بعمل اكلة منة
    بريتك شديد لكن اعفي لي عليك الله وان شاء الله ربنا يسهل ليك واشوفك واتعرف عليك اكتر واكتر
    ربنا يديك الصحة والعافية

  111. ماشاء الله يا سمساية عارفة كلامك الاول زكرني نفسي لاني زيك
    بحب المطبخ والطبيخ لكن الاختلاف انو ما لاقية زول يشجعني ناس بيتنا محبطين ويحبو المكاواة
    لكن بعد ده كلو ما قعد اشتغل بيهم لاني بستمتع لم اعمل حاجة جديدة بالجد الطبخ ده فن وهواية
    انا فخورة انو وحدة سودانية تكون عندها زي المدونة دي ومن خلال الردود حسيت انك بالجد قدمتي
    نصائح ومسعدات لكتير من الاخوات ووقفتي في مطبخ كل وحدة وساعدتيها يعني انتي بقيتي ام لاي
    عروس جديدة وبعيدة عن اهلها وعلمتيها وبقيت اخت لاي وحدة دايرة تعرف حاجة جديدة
    بالجد يديكي الف عافية وياريت لو كنتا لقيت الصفحة دي من زمااااااااااااااااااان
    اسه كنتا حاكون منال العالم عدييييييييل كده ههههههه وانتي ما اقل منها يا سمسمايتنا
    استمري ونحنا منتظرين جديدك وبالتوفيق يا رب..اختك…سارة
    حتلقيني معاكي هنا طوااااااااااااالي…حابراكي بري جري نفس عمييييييييييييييييييييييييييق

  112. السلام عليكم و رحمه الله و بركاته
    سعدت جدا بالعثور على مدونتك
    عثرت عليها بالصدفه و انا ابحث عن وصفه
    نسيت ان اعرف بنفسي
    انا د.سوسن من منتدى لك

  113. اجمل التهانى بمناسبة عيد الاضحى المبارك
    لكى منى كل التقدير على هذا المجهود
    اتمنى ان تقدمى لنا بعض النصائح التى تحببنا فى الطبخ ذلكم العالم السهل الصعب
    ابحث دوما عن الوصفات السريعة السهلة فهل لكى ان تعينينى على ذلك
    مع كل الود

  114. السمسماية صغيرة جدا لكنك مشاء اله كبيرة بالعملك الجميل دا اشكرك على اهتمامك بالاكلات السودانية واهتمامك بالرد على كل سؤال .
    عمل جميل ومقدر

    اخوك ابو التيمان من كسلا

    • تسلم اخي ومشكور علي الاطراء
      وان شاء الله ربنا يقدرني علي المواصلة والتواصل مع زوار مدونتي
      لك التحية

  115. الاخت سمسماية

    يا خسارة لو ما متزوجة ؟
    طبعا حيكزنو خسرانين الرجال
    متزوج لكن داير مرتى تكون زيك
    شكرا
    نجاشى

  116. سلامات
    كل سنة وانتي طيبة وربنا يحقق امانيك
    ماشاء الله عليك وعلي طبخك
    ربنا يوفقك
    انا من المعجبين بي المدونة شديد
    وشكرا ليك كتير يارايعة

  117. طبعا ياسمسمايه صورتك عسسسل زى اكلاتك واسلوبك الجميييل يا مفخرتنا …يابخت اهلك بيك ياعسسسل واتمنى نكون اصدقاء ونتواصل مع بعض…مع دعائى الدائم لك بالتوفيق.

  118. تسلمي سمسمايه على مجهودك وصراحه استفدته منك كتير ربنا يوفقك ان شاء الله

  119. تسلم يدك سمسمااايه ماشاءالله تبارك الله ربنا يحفظك بالجد انا ادمنت الموقع وانا عروس جديده استفدت جدا جدا ومتابعة برضو القروب في الفيس موفقه ياااارب وفى ميزان حسناتك ان شاءالله

  120. والله انت انسانه مبدعه وحاجاتك جميله انا اليله اول مره اشوف الموقع وفيه اشياء مفيده بالجد وافكار جديده ربنا يديك الف عافيه حاطبق واوريك بس اكيد ما حتظبط زى حاجاتك والف شكر

  121. والله انت واحده مبدعه بكل النواحى وربنا يباركك ويزيدك وبالجد حاجاتك حلوه شديد حاطبق وانشالله حافيدك الحصل شنو لكن اكيد ما حيطلعوا زى حاجاتك وربنا يوفقك

  122. السلام عليكم … الاخت سمسمايه جزاك الله خيرا على هذا المجهود الرائع.. انا من اشد المعجبات بك واحيك على هذا المجهود الرائع … احببت مطبخ ويشرفنى ان اكون من اصدقاءك…

    بارك الله فيك

  123. انا اميمه فاروق خليل محمد من مدينه حلفا الجديده واعيش فى نيجيريا مدينه ابوجا انا فخوره جدا بك يا سمسمه لانك حليت مشكله الشباب بى الزات الايامات الحاليه البنات لايعلمون فن الاكل ولاكن يعلمون فن النت انا متزوجه ام لى 4 ابنا لديه الخبره الواسعه فى المطبخ وبالرغم من كدا كنت الجا الى مطبخك العامر لك منى خالص الشكر اتمنى التواصل معك

  124. السلام عليكم ورحمة الله
    اتخيلي معاي بنتت ما ليها علاقة بالمطبخ وعرس جا بسرعة وغربة مباشرة مع دفتر وصفات بافكار ناس البيت لكن اكيد ما كل الاكلات ولا كل الشرح الكافي بس مشى الحال لحدي ما دخلتة مطبخك العامر وتذوقتة اكلك الشهي ما لي الا اقول ليك الله يديك العافية ويسدد خطاك ويحقق ليك كل ال في مرادك ويعدك يارب . . .

  125. السلام عليكم ورحمة الله وبركاته

    حبيبتى انا متابعاكى هنا وفى منتدى لك واحب اسجل اعجابى الكبير بك وبمهارتك ما شاء الله

    وحبيت افرجك على القرقوش بتاعى انا باعمله تقريبا بنفس طريقتك بس احنا متعودين نعمله من غير مقادير فكنت باحتار ادى الوصفة لحد لكن بمقاديرك اصبح الموضوع اسهل وانا باستخدم خميرة العدس واصفيها او خميرة السمسم وباضيفها كلها للعجين وباضيف للعجين كركم بيعطيها لون حلو

    ماعرفتش ازاى اضيف الصور لكن ادى الروابط واتمنى يعجبكم

     

     

    • نسلمي اسماء
      نزلت ليك الصورة وطبعا ما شاء الله ابداع بس ورينا خميرة السمسم
      انا بعرف العدس والكبكبي

  126. الله يكرمك حبيبتى

    خميرة السمسم هى زى خميرة العدس يعنى باحط ملعقتين سمسم فى برطمان زجاج واضيف عليها الحليب المغلى واقفل كويس والفها واحطها فى المطبخ فى مكان دافئ مظلم لحد ما تفصل حسب الجو بتاخد وقت

    واتمنى تضيفى صور تطبيقى فى صفحة التطبيقات مع الاخوات الحبيبات اماسى وهنوها وغيرهم

    معلش غتاتة هههههههههههههه

    احبك فى الله

  127. Dear Simsimaya,

    I just came across your webiste few minutes ago and I was so happy and impressed with your receipies and work. You are doing an amazing job and very nice dishes.

    I will be watching your site from now on and make as much as I can.

    I love it.

    Khartoumy (living in England)

  128. انا معجب ….ومتابع الوصفات وتعلمت الكثير منك شكرآ ونحن فخورين بيييك …..عزابة في مدينة ابوظبي

  129. شكرا سمسمايه عمل جميل ومنظم وانا طبعا كنت ببحث عن القرقوش ووجدت الموقع بالصدفه واعجبنى وسوف اطبق الوصفات ان شاء الله واوافيك بالنتايج

  130. السلام عليكم
    معاك ام مجتبي من اسكوتلاند
    و الله انقزتينا بموقعك دا, و الفضل لله ثم اياك علي تنوعنا في اصناف الاكل
    جزاك الله عنا كل خير

  131. اخت سمسماية ما شاء الله عليك مجهود كبير ومقدر انا في المانيا وكنت محتاجة بالظبط للموقع بتاعك دا يالجد شكرا وربنا يجعلو في ميزان حسناتك يا ريت لو اتعرفت عليك وانا في السودان كنت زرتك واتعرفت عليك. انا يا سمسماية ما بحب المطبخ شديد ويا دوب بديت اتعرف على اسرارو وموقعك دا افادني جدا ورأيي في المطبخ بدأ يتغير

  132. يارب يرحم والديك. ويحفظك. ويسعدك وينولك كل ماتتمني. شكرا شكرا. على كل. ماقدمتي جعله. الله في ميران حسناتك. ووالدتك. آمين. صراحه اول مره ادخل. على صفحتك امس 17رمضان وحبيت اعمالك واليوم عملت الناعم مشكوره هل تصدقي اول مره اشترك في تعليق. اتمنى ان يعجبك مشكووووره

  133. انا فخورة بيك يا سودانيه يا اصيله . استفدته منك كتير اجتهدى وربنا يوفقك.

  134. تسلمي كتير يا سمسماايه علي الموقع المفيد والوصفات اللذيذه .. بالجد ما قصرتي شرح دقيق وكافي ووافي .. الله يديك العافيه

  135. السلام عليكم طولتا منكم شديد وفرقتو علي شديد لكن عودنا والعود احمد وطبعا ماشاءالله ابد من وين وانته وين تبارك الله ربنا ازيدك واعليك

  136. الاخت العظيمة تحية طيبة اهديك احلى سلام واقول ليك اتشرف انى سودانية مدام فى زيك فى وطنا اختى اشتركت فى منتدى جميل وطلبو منى اكلات من بلادى ممكن انقل منك اذا مابضايقك حابة انهم يتغرفو غلى صورة جميلة انتى عكستيها فى عملك

  137. سمسماية كل الاحترام والتقدير يا مبدعه وبتمني ليكي التوفيق والتقدم لانك اصبحتي مرجع مهم وبتعكسي صوره حلوه لاكلاتنا السودانيه والانا بصراحه حبيتا بعد ما طبقتها منك وبالجد بنفتخر بيكي ووشكرا الف شكر علي الموقع

  138. ماشاالله وصفاتك عجيبةوجميلةورائعةوانامابحس بالزمن معاك وبرضوبكتب في دفترربنايخليك

    • السلام عليكم اختي سمسماية لك كل الشكر والتقدير انا عملتا بسكويت سمسماية للشاي بس طلع شوي قوي ماهو السبب؟

  139. ربنا يخليك ويحفظك ويخليك لينا يااغلي صحبه وكل كلماااااااات الشكر في حقك قليلة استفدنا كتيييييييييييييييير من كل وصفة وصفتيها لينا

  140. السلام عليكم ورحمة الله وبركاته
    ما شاء الله عليكى أختى، جزاكى الله كل خير وجعل ما تقدمين فى ميزان حسناتك
    ونفع بكى دائماً ورحم والدتك رحمة واسعة وأسكنها فسيح جناته
    إنـــــــه ولـــى ذلك ومــــــــولاه.

  141. الاخت العزيزة سمسماية اولا انا من المعجبين بك وحقيقة انتي اروع من اي شيف لانو كل الشيف العرب اكلهم ما صعب زي اكلنا نحنا السودانين والجميل في الامر انو طريقة عملك للاكلات خطواته واضحة وبتسهل لاي وحدة ممكن تعرف تعمل الحاجة من طريقة وصفك في الحقيقة انتي بقيتى لينا مرجع اساسي لاي حاجة ما بنعرفة وبنفخر انو في سودانية مثلك ارجو ان يدم الله لكي نعمة العافية وايدك تتلف في الحرير زي ما بقول المثل عندي سوال محيرني ما لقيت ليهو جواب الكريمة البعملوه في الشوربة ما عرفته هي لبن ولزبادي اتحيرته ما لقيته في السوبر ماركة في بورتسودان طبعا نسية اعرفة انا ام فاطمة من بورتسودان من اكتر المعجبين والفخورين بكى

  142. تسلمي ياسمسماية وربنا يزيدك من فضله ويديم عليك نعمه ويجزيك عننا كل خير. انا مغتربة وحديثة عهد بالطبيخ لكن الحمدلله استفدت منك كتييييير. ماشاء الله عليك وربنا يحفظك

  143. الله يديك العافيه على اكلاتك الرهيبه اطلب منك فضلا لا امرا طريقه عمل كسره الحبش

  144. انا مبتدأه في المطبخ و الحمد لله تعلمت الاساسيات من حبوبة و ماما ساعدتني كتير لكن فيما يخص التنوع في الاصناف تعلمته من مدونتك و تشجعت لعملها لانك بتدينا ليها بصورة مبسطة و سهلة و الصور كتير بتساعد .. تسلمي لينا و تسلم يدك و لها الرحمة والدتك فقد اهدتنا سمسماية روعة .

  145. امي الله يرحمها كانت بتقول المطبخ علم عين , وانا اتعلمت منها الكتير واهم شي اتعلمته احب المطبخ والطبخ
    رحم الله امواتنا يا سمسمايه ولك مني الف شكر وتقدير

  146. روووووووووووووووووووووووووعه يا سمسماويه احييك والله

    انا عايشه مع بابا براي في البيت وكل يوم بحاول اعمل ليهو(عصيده بملاح) براي من غير مااسال الجارات وطبعا بضطرافتح النت مرات عشان افهم شي هههههههه والاكل الشعبي معدوم من النت عشان كده عاجباني فكرتك شديد
    لكي مني جزيل الشكر

  147. شكرًا ليك وربنا يحفظك ويعينك ويقويك على فعل الخير لأنو بالجد مساعدتك لينا بالوصفات المظبوطه عمل خير وربنا يزيدك من نعيمه

  148. سمائه والله انتي بالجد زي ما بقولو مره والنسوان ورا هاهاهاهااا
    أنا طبعاً بشوف الموقع ومتابعه وصفاته لي أمكن سنه بس ولا مره شكرتك مع انك تستحقي الشكر وكل الشكر انتي ساعدتيني كتيييييييير في المطبخ والحمد لله طبقت اكتر من وصفه من عندك ونجحت الموقع كلو رهيب وشرح الوصفات واضح جداً والأكلات حلوه وحتي عدتك البتقدمي فيها رهيييبه ماشاءالله تبارك الله عيني بارده أنا هاهاهاهااا أن شاء الله ربنا يجازيك كل خير علي الموقع ده وفي ميزان حسناتك ياااااارب

  149. السلام عليكم الاخت سمسماية \ انا ست بيت جديدة علي عالم الطبخ والمطبخ بس شغلك حببني في الطبخ بجد انتي رائعة والي الامام

  150. سلامات يا سمسماية موقعك جمييييييييل ومميز ومرتب جزاك الله خير وانا معجبة شديد بموقعك وشخصيتك وشكراعلى المجهود المقدر

  151. أنا متابعك لى مدة ومااتمكنت اراسلك لكن المدونة اكتر من رايعة ومشَكورة كتير وربنا يديك العافيه

  152. مدام سمسماية لك التحية والتقدير وبالجد تشكري على وصفاتك وتطبيقاتك وصورك وطريقة شرحك واكتر شخص استفدت من خبراته في الطبخ كان حضرتك واصلي على تميزك وفي ميزان حسناتك يارب

  153. السلام عليكم يا سمسماية انا ام ابو عمار وعمار جاي في الطريق انشاء الله بالسلامة ارجو منك مقادير المشبك مظبوطة وتسلمي يا غالية

  154. الأخت سمسماية…لك من الشكر اجزله علي هذا الموقع الجميل الراقي والمشرف لنا جميعا…واتمني لك التوفيق من كل قلبي وان تكوني في تطور مستمر…ولك التحية

  155. لك كل الود والتقدير ملكة مطبخ سمسماية ….يعجز لساني عن وصف مجهودك الرائع الذي اصبح بمثابة مرجع شامل لي بصورة خاصة ولكل السيدات بصورة عامة ….جعله الله في ميزان حسناتك يارب .

  156. ربنا يبارك فيك وفي رزقك والله وصفاتك ابداع وبقت لينا مرجع في الغربه ربنا يريح بالك ويديك الفي مرادك يا سمسمايه يا جميله

  157. حتى انا كنت فاشلة في الطبخ لكن لمن عرفت مطبخ سمسماية صرت ممتازة مع انو انا عمري بس 12
    بارك الله فيك و الله يجزيك خير

  158. سلام يا سيدة الابداع صراحة لي اكتر من سنة بتابع بس ما حصل علقتا كتابة كنتا بسأل ما بتعملي كورسات خاصة بالطبخ

  159. السلام عليكم
    الغالية سمسماية,,, قبل كمممم سنة في منتدى لقيت الاسم دا ( سمسمية ) وكنت فايزة في مسابقة طبخ رمضانية لو اذكر المهم احساسي ساي قال لي الزولة دي سودانية وفرحححت ليك شديد والله من جووووة قلبي,,,, واليوم فرحت اكتر لاني لقيت المدونة الرااااااااااااااااااااااااااائعة دي,,,, ما تتخيلي مقدار شكري وامتناني ليك على الوصفات ,,,
    استمري بذات القوة سمسماية وربنا يديك الصحة والعافية ويقويك …ولك ودي

  160. تسلم الايادى ووفقك الله وسدد خطاك, انا اخدت كتييير من وصفاتك وطبقتها وجد كل واحدة بتطلع احسن من التانية , اخر خبيز ولادتى كل وصفاتو اخدتها من عندك , نسال الله الرحمة والمغفرة لوالدتك العزيزة ولك التوفيق

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s