ملوخية مفرومة (1)


ملوخية مفرومة علي الطريقة السودانية

المكونات:

¼  كيلو لحم ضأن، بصلة كبيرة

ملوخية مورقة، ثوم مفروم، زيت

ملح، بهار (فلفل، كزبرة)

الطريقة:

تغسل الملوخية وتترك حتي يتصفي الماء

توضع في صينية واسعة وتترك حتي تجف من الما تماما

اقوم بقص الملوخية بالسكين قبل ان ابدأ في فرمها

(بهذه الطريقة الفرم لايحتاج الى وقت طويل)

ثم تفرم الملوخية حتي تصبح ناعمة

تجهز الشوربة: يقطع اللحم وتغسل وتوضع فى الحلة، ويضاف الملح

يقطع البصل مربعات صغيرة ويوضع مع اللحم

توضع الحلة على نار منخفضة وتغطي حتي يجف الماء

يضاف الماء حتي يغمر اللحم وتعلي النار حتي تبدأ في الغليان

ثم يخفض النار وتترك حتى تستوى

يضاف البهار وقليل من الثوم المفروم الي الشوربة

ثم تضاف الملوخية المفرومة وتقلب

وتترك حتى تستوي لمدة 5-7  دقائق

في مقلاة نضع الزيت والثوم المفروم علي النار

ويقلب علي النار حتي يصبح ذهبيا

يضاف الثوم المقدوح الي الملوخية المستوية

تقدم مع الارز او الخبز او مع الكسرة السودانية

About these ads

22 comments on “ملوخية مفرومة (1)

  1. انا بستعمل الملوخية المجمدة هل استعمل نفس الطريقة دي ولا كيف انا كنت اول شئ بعمل دمعة وبعدين بكب فيها الملوخية بس لونها بطلع زي الرجله خخخخخ ياريت تفيدوني
    والبصلة ماشايفاك عملتي ليها حاجة يعني زابت ولا كيف واكون شاكرة

  2. والله ياسمية ماعارفة اقول ليك شنو
    من ماتزوجت وطبخت ماحصل الملوخية طلعت باللون دا والطعم دا والريحة دي صراحة ماعارفة اقول ليك شنو غير الله يجزيك الجنة يارب ويخلي ليك اولادك وابوهم يارب

    • اختي الغالية ام احمد
      ان شاء الله بالهنا
      ان شاء الله اقدر اعمل ليكم كل الطبخات يا ام احمد
      ومشكووووورة علي الدعوة
      بس ياستي لا في أولاد ولا في ابو اولاد :)
      مودتي

  3. طلعت حاجة جناااااااااااان
    ياريت تعملي لينا باقي الملحات عشان اتعلم
    الله يديك حسن الخاتمة يارب

  4. ملوخيتك فنانة ما شاء الله , بس مافي طريقة تانية للفرم غير الطريقة التقليدية دي , يعني خلاط العصير او المفراكة الكهربائية ينفعوا معانا ؟

  5. رهيبه ياسماسم الملوخيه ربنا يديك العافيه….بالنسبه لفرم الملوخيه يا اميمه انا عندى مفرمه يدويه في الاساس للطماطم لكن انا بفرم بيها الملوخيه وبتلقيها في اي مول متوفره غير الفرامه التقليديه …..لكن انا لغيت امي بتفترمها بمفرمة الكهربا براون

  6. انا اليوم حابه اعمل الوصفة بس ماشايفاك حمرتى البصله بدوب كيف ومافى صلصه فى الملوخيه الطبيخ الرجاء الرد السرييييييييييييييييع

    • يا ستي البصل بيدوب لانها دي شوربة لما اللحمة تنجض البصل بيكون داااب :)
      والبصل قطعته عشان بعدين يخلي الشوربة ثقيلة شوية
      دمتي بخير

      • سمسماية يمكن ام عبودي شافت الوصفة التانية البتكون الملوخية في تسبيكة زي الدمعة

  7. مممممممم لذيذ تسلم الايادي هي حلوة بس شغلتا كتييييييييييرة ورييق الملوخية وفرمها ونشيفها
    وعندي ليكم حركات لونفعت معاكم ادعو لي
    لو مستعجلة وعايزة الملوخية تنشف سرييييييييييع جيبي كيس مخدة نظييييف وختي فيها الملوخية بعداك دخلي نشافة الهدوم الفي الغسالة ثواني وتطلع ناشفة(مجربة)
    لفرم الملوخية بسررررررعة نستخدم مفرمة اللحمة العادية اللي بنعمل بيها بسكويت النشادر هههههههه بس ما تمشو تختو القمع لا لا لا بدلوها بي سنون الفرم(صراحة ما جربتها)

  8. سمسماية تسلم يدك يا غالية
    عندي سؤال بس
    أنا تقريباً بعمل الملوخية بنفس طريقتك
    بس ما عارفة ليه بحس إنو فيها طعم الخدار
    ما عارفة قدرت أوصل المعلومة ولا لأ
    مرات بوسوس بقول يمكن الخدرة ما إستوت
    مرات بقول لأ يمكن خليتها أكتر من الزمن المطلوب
    تشوري علي بي شنو يا غالية ؟؟؟

    • مرحب مها
      الملوخية مطعمها ملوخية :)
      الملوخية المفرومة ما بتحتاج تقعد كتير في النار يعني بتستوي سريع (واسواس انها ما نجضت دا اعملي عليه ×)
      تانيا لما تخليها كتير ما بتبقي فيها طعم الملوخية المميز انت اعمليها وانسي الافكار دي
      هي طعمها كدا مميز اعملي فيها نقطة ليمون في الصحن وما بتحسي الحاجة دي
      دمتي بخير :)

  9. السلام عليكم يا حبايبنا
    انا عزابي في كندا و داير اعمل لي دجاج بالدمعه و غلبني عدييييييييييل والله فداير مساعدتكم لو تكرمتو
    ممكن ترسلو في الايميل او الفيسبوك
    و جزاكم الله عني و عن كل العزابه هنا خيرا
    محمود

    • iهلا محمود ربنا يرد غربتك سمسماية عندها قروب بالفيس بوك http://www.facebook.com/home.php?sk=group_367324315943&ap=1 و دا الرابط
      الدمعة بس بتقطع البصل و تشوحه على النار لحدي ما يبقى شفاف و بعد كدى تخلي سوية ماء عشان يكون ناعم و لو عندك الخلاط اليدوي (براون او ملينكس اظن جميع الشركات عندها) المهم تخلطه و معاها طماطم عشان يعطيه نكهة و تخليه على النار بعد كدى تقطع الدجاج و احسن تشيل الجلد منه عشان ما تكون دسمة ما تقدر تاكلها ههههههههه و تغسله و ترميه على البصل و لاحظ لو لحم بتخليهو مع البصل من البداية عشان ما بيستوى سريع المهم قريب النضج بتضيف الصلصة و البهارات ملح و كسبرة قرفة جنزبيل مسحون و لو في كركم و الشطة لو بتحبها وما تنسي لمان تتسبك الثوم اهم حاجة و يكون كمان مجهز الليمون و القراصة ههههههههو اكيد سمسماية ح تطبقها ليك عمليا لخاااااااااااااااااااااطرك

  10. يا سلااااام جربتها أمس طلعت حاااجة كدة وعجبت (بعلولي) شدييد تسلمي ياعسل
    عندي طلب ياسمسمة صراحة انا كل ماأمشي السوق بتعجبني ادوات الطبخ شديد بس في اشياء مابعرف بيستخدموها لي شنو واسمها شنو اصلا
    ولم أعمل بحث في قوقل مابلقاها ياريت لو بتقدري تجمعي لينا مجموعة من الادوات والاجهزة في قسم خاص يكون بإسم أدوات مطبخية وتكوني خدمتينا شدييييد والله
    نحن عايزين مدونتنا الغالية دي تكون أي شي يخص المطبخ فيها وياريت لو جمعتي لينا البهارات بأسماءها وصورها
    تكوني ضممممممة ماقصرتي(طماعة صاح؟)بس عايزين نكسب الزمن بدل مانلف من موقع لي موقع عشان حاجة واحدة _وشششكرا

    • تسلمي هندود والهنا عليكم
      اقتراحك جميل وان شاء الله يكون موضع دراسة واهتمام
      مشكورة علي اهتمامك وحبك للمدونة
      دمتي بخير وعافية

  11. الاخت سمسماية
    يدك طاعمة ما شاءالله بس عاوزين نعرف الملوخية المفروكة وكمانالروابط تكون بالاسم لانو الصور ما بتديك العاوز تبحث عنه شكرا ام ميادة

    • تسلمي يا غالية
      بالنسبة لفحة الروابط اذا وقفت علي الصورة بالمؤشر ح تلاقي الاسم بتاع الاكلة يعني صورة اسم الوصفة زائدا الرابط :9
      دمتي غالية

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s